خاطرة هاربة

المشاعر الانسانية على الرغم من بسطاتها فى الشكل المجرد الا انها معقدة جدا 

يعنى الشعور بسيط اذا بالحب او الكراهية او الخوف او الحنين او الوجع او الحزن او السعادة او الافتقاد او الغيرة حتى الاستسلام واليأس والتفاؤل والأمل و الندم .. الشعور نفسه بسيط لكنه فى غاية التعقيد فى نفس الوقت

بستغرب كتير لكون الاحاسيس دى على ضخامتها بتقدر تتحملها خلايانا الدقيقة جدا اللى ممكن تتخدش بطرف ورقة فى كتاب جديد فما بالك بقى بالخلايا المسئولة انها تحس جوانا بالحاجات دى كلها

كمية المشاعر اللى بتعصف بالخلايا دى وتخلى روحك طايرة منك سواء فرح او حزن معقدة جدا 

اعتقد اننا لو نقدر نحس حاجة واحدة فى وقت واحد الشعور هيكون اهون علينا كتير وهنقدر نتعامل معاه بشكل افضل .. لكن الشعور مبيكونش مجرد اوى كده

بنكون بنحب وبنخاف فى نفس اللحظة وبنحن وبنكره نفس الشخص وبنيأس ونحلم فى نفس الموقف وبنغير وبنتوجع فى نفس اللحظة .. الشعور مش مجرد اوى كده زى ما بنقدر نكتبه 

بدليل ان كتير مننا بتخذله كلماته كلها وحروف العربى اللى اتعلمها من زمان انها توصف حاله فى لحظة من اللحظات اللى بيفيض بيها الشعور جواه ومبيعرفش يوصف احساسه

وبدليل ان الاحاسيس دى بتتحرك كتير عكس ارادتنا وعكس المنطق وعكس المتوقع 

فبنلاقى نفسنا بنحن لناس المفروض ننساهم وبنحب ناس كانت بتوجعنا وبنفرح فى اللحظة المليانة حزن وبنحزن فى الاعدة المليانة ونس وبنغير على قد ما بنحب وبنفتقد أحبة عمرهم ما هيكونوا فى يوم معانا ولا حتى هنلمحهم فى الطريق واحنا مش واخدين بالنا وبنندم على كتير عشناه ونتمنى نرجع يوم واحد نعيشه تانى 

ده احنا .. ده انا .. والاحاسيس عمرها ما كانت باللون الابيض والاسود .. بالعكس الاحاسيس كلها واخدة كل درجات الالوان بين الابيض والاسود مرورا بالرمادى اللى بنضحك بيه على نفسنا والازرق بصفاء السما والبحر والاحمر بلوعته والاصفر بغيرته والاخضر بفرحه والبنفسجى بروعته والبرتقالى بأشراقته ... احنا كل الالوان فى كل يوم .. انا كل الالوان فى نفس اللحظة 

زى الاعدة على النيل وقت الغروب تحت ضل شجرة ورد ابيض مع كوباية شاى بنعناع وايدك لامسة ايد حبيبك اللى مغمض عينه فى منتهى الهدوء والسلام قدام شعاع الشمس اللى لسة بيعافر ميغبش وينزل يطفى فى النيل .. انا الالوان .. والماضى الواجع والحاضر المعافر وبكرة البشوش .. انا البشاشة كانت من بقية ملامحى وفقدتها لما زادت الهموم .. انا ضحكة بتقول كتير ووردة بتعافر على الغصن عشان تعيش 

انا .. جوايا كتير 

اسمعوا التراك
 https://soundcloud.com/esraa-kamal-1/changeling-soundtrack-16-end?in=esraa-kamal-1/sets/changeling-soundtracks-very

this photo from >> https://www.facebook.com/pascalcampionart?fref=ts