العيلة =)

لمة العيلة على الغدا كل يوم جمعة بعد صلاة العصر وقبل المغرب ..فيها معنى اكبر من انهم بيشاركوا بعض فى نفس الاكل
فيها بنوتة قاعدة جنب باباها والجنب التانى ماماتها بتنكش هنا شوية وهنا شوية 

D= ويابابا مش عايزة اكل تانى وبابا بيغرفلها تانى  

ماما بتسال دايما حلو الاكل ؟ طبعا حلو يا ست الحبابيب هو انتى بتعملى حاجة وحشة اهو عندك انا احلى حاجة فى البيت دة  D=
فيها اخوات قاعدين على الاكل عمالين يناقروا فى بعض لحد ما بابا يزعق فبس بقى بطلوا وكلوا , فيها غلاسة لما تروح تاخد باقى رغيف العيش من عند حد على السفرة مع انة ممكن تطلع عيش من الكيس بس لا هو حلو اللى عند اخوك او اللى عند ماماتك =)=)
فيها كلام مين هيعمل اية بعد الاكل ومين هينام شوية ويا ماما خليكى صاحية حبة اقعدى معانا هنعملك شاى بس متناميش
وتيجى خناقة شيل السفرة انتى البنت وانتى اللى تشيلى واية يعنى لما تشيل انت كمان ما انا اوقات بجيب حاجات من تحت ..وياعينى تدبس فيها ماما كل مرة عشان تخلص من الخناقة  3>3>3>
 ووهى بتلم ورقة الجرنال تلاقيها بتشتمنا وتقول والله انتوا مهزئين حد فيكوا يعملى شاى بقى=)
ساعتها تأنيب الضمير بيكون عالى فأى حد فينا يعمل الشاى وعادة بيبقى اللى ملحقش يهرب ويقول انا ورايا حاجات اعملها D=
فيها صوت من المطبخ جى.. براد بيتملى مية وسؤال "مين هيشرب شاى مع ماما؟؟"

فيها بنوتة ايديها مبلولة بعد ما غسلت ايديها جريت ورا اخوها تروشة بالمية وهو بيتعافى عليها وترجع تصوصو وتقول يا بابا الحقنى ..الله لما انتى مش قد الهزار بتهزى معاة لية ..انا اهزر اة هو ميهزرش

فيها دفا لما يتلموا بعد الاكل واللعب دة على الكنبة قدام التليفزيون وكل واحد ركن على التانى وكأن مفيش حتة فى الشقة تنفع للاعدة غير الكنبة دى ويتناقروا شوية على الريموت وهنتفرج على اية  لحد ما يرسوا على حاجة يتفرجوا عليها

كل يوم هدية من عند ربنا ولما بيبقى فية عيلتنا بنحمد ربنا اكتر على نعمة العيلة

العيلة مش شوية اهل قريبين زيادة قاعدين فى نفس البيت مع بعض , العيلة حضن دافى لما يتقرص على الواحد برة وامل جديدة فى ضحكة كل ام وهى بتصحى ولادها وامان فى كل أب بيطمن انة كل واحد نايم فى مكانة وهو بيقفل باب الشقة بليل

العيلة رزق مبيحسش بية غير اللى اتحرم منها

يارب باركلنا فى عمر اهلنا وارزق جميع المسلمين بالازواج الصالحين والذرية الصالحة اللى يعزوا بيها دينهم ووطنهم

وارزق كل محروم من عيلة رزق الرضا والقلب الكبير وخلية الناس تحبة ويبقى عندة عيلة فى كل مكان فى عشتة

رحمة الله على كل اب وام فقدهم اولادهم يارب يصبركوا ويكتبكوا فى الجنة معاهم

الحمدلله على نعمة العيلة وعلى نعمة اللمة والقلب والروح الواحدة

الحمدلله