الثورة مستمرة

الذكريات والنسيان دول نعمة من عند ربنا بنفتكر حاجات حلوة بسطتنا وحاجات صعبة اتعلمنا منها وربنا بيكرمنا وينسينا حاجات وجعتنا

وفى حالتى.. انا بنسى كل حاجة ومش بفتكر اغلب تفاصيل المواقف اللى بعيشها وكمان الاحداث نفسها ,, بس مقدرش انسى يوم ما نزلت ميدان التحرير ساعة شارع محمد محمود

لما نزلت من البيت عملت حساباتى انى احتمال كبير مروحش يومها , خلصت اللى كان لام يلخص وامانات الناس وسلمت على امى وتوكلت على الله وانا شايلة كفنى على ايدى زى ما بيقولوا   

 روحت الميدان من ابعد طريق عشان ابقى شايفة اية اللى بيحصل روحت من شارع القصر العينى

وصلت لكنيسة قصر الدوبارة وانا هموت من الرعب سالت على الباب فين الخيام اللى بنساعد فيها , قالولى اتنقلت كلها من الكنيسة , زى الصورة اللى صورتها عينى متخزنة فيا بعدها لفيت لقيت عربيات اسعاف كتيرة اوى سالت حد من الناس اللى فيها وقالى الخيام الطبية فين , روحت وسلمت على الدكاترة اللى هناك  وواحدة كانت معاهم بتحرس الخيمة , سالت محتاجين اية وساعدتهم فى ترويق الصيدلية اللى روقتها بالالوان بتاعة علب الادوية والعلب المربعة هنا والمدورة هنا وهكذا

شوفت ايامها شباب بيجى على ضهرة يحسر و ساعة ضرب القنابل المسيلة للدموع كانت ريحتها قذرة كنا برة الشارع بكتير  وكنا حاسين بيها جوانا , انا افتكرت دة من يومين لقتنى مش ناسياة ولقيت انة مخدناش حاجة غير ولادنا وشبابنا ورجالتنا وبناتنا اللى بيروحوا واحد ورا التانى اذا كان فى الميدان واذا كان فى المحاضر ولا فى الاقسام ولا السحل فى الشوارع و المحاكمات العسكرية اما اهالى الشهداء ولادهم اللى ماتوا فلسة بيدعوا دعوة مظلوم كل يوم فى عز ما الناس نايمة اهاتهم مصحية قلوبهم مخلياهم مش دايقين النوم ,,, رحم الله شهدائنا وصبر اهلهم وكان اللى فى عون المظلومين
يارب رد لنا كرامتنا ورد لنا عرضنا ورد لنا اهلنا ..يارب انت الكبير على كل شئ واذا كنت تريد ان تمدهم فى طغيانهم فيالله لقد ضاقت بنا الاحوال فهل لك ان تفرجها علينا يا كريم
يارب ليس لنا سواك فكل ما نريدة هو وطننا واهلنا وعرضنا

يوم القيامة سنرمى عليهم جميعا جميييييع ذنوبنا بحق ما اذوا اولادنا وهتكوا اعراضنا وسرقوا احلامنا لن نسامحهم وسيبقى الحساب بيننا يوم نتقابل بين يديك يا الله

الثورة مستمرة