تسجيل تاريخي

 منذ فترة تخيلتها طويلة للغاية من كثرة ما مررت به ومن كثرة ما فقدته ..
كان كل شئ يبدو مختلفاً .. كان الأمل يملئنى وانظر للغد بشوق
منذ فترة ليست ببعيدة كنت اعرف تماما اين اقف الآن والى اين ومتى سأمضى ..
مثل هذه الأيام من سنة مضت .. كان كل شئ يبدو ..
يبدو غير الآن
للتسجيل (عيد الفطر 2014 )

حكاية الايام دى غريبة .. يعنى احساسك بالوقت نفسه بيتغير من مرحلة للتانية فى عمرك
فى وقت فات مكنش بعيد .. كانت فى حاجات كتيرة مختلفة .. همممم ابتدى منين !!
خلينى ابتديلكوا بيوم كان لطيف خلصت شغلى وكنت عارفة اننا هناخد اجازة اسبوعين ونرجع تانى الشغل، كنت مروحة راضية بالمكان اللى كنت فيه، كنت ماشية فى الاتجاة اللى كان بيزودنى فى شغلى وكنت شغالة مع ناس بحبهم وبثق فيهم
خرجت من مكان الشغل وروحت هلكانة تعب .. ومن ساعتها مدخلتش مكان شغلى تانى بنفس الاحساس ..
وقتها انا كنت عارفة انا واقفة فين ورايحة فين .. من بعدها لما كنت بروح مكتبى مكنتش ببقى عارفة ولا انا فين ولا رايحة فين وخصوصا اليوم اللى رحت عشان اخد حاجتى من هناك .. شوية ورق اتعلمت فيهم حاجات وكتاب كنت ناسياه فى درج المكتب وورق شغل كان معايا وسبت كوبايتى وخدت بعضى ومشيت .. اكتشفت بعدين انى سبت منى فى المكتب وانى لما نزلت يومها مخدتش بعضى كله .. بقى زيه زى اى مكان فى كافية بتروح تعد فيه شوية
وادى نقطة ومن اول السطر

كان فى حياتى اصحاب وقعوا من منخل الايام بالترتيب كل واحد لما جه المنخل اللى معرفش يقف عليه .. وقع
ودى نقطة كمان ومن اول السطر