فى حاجات كده بتضيع منك على مدار الايام فى العمر .. فى زحمة الايام مبتخدش بالك من اللى بيتسرسب م بين روحك
بس مرة واحدة بتقف تلاقى نفسك بقيت واحد تانى
حاجات كده مبتعرفش توصفها ولا تحطها تحت عنوان .. حاجات كانت بتعرّفَك عاملة زى بيانات بطاقتك
بس فى يوم بتبص فى البطاقة مبتلاقيش تفصيلة واضح انها كانت مهمة
زى العتاب كده .. عارف لما تبطل تعاتب وتحس انك بقيت خفيف من جواك
لما تلاقى سقف الاعذار اللى بتعذرها للناس اللى حواليك اللى بيهموك بقى عالى اوى
متفهمنيش غلط انك تلتمس العذر دى حاجة حلوة اوى .. بس انك تفقد رغبتك فى العتاب هنا تبدأ تعرف انك سبت حاجة منك فى الايام اللى فاتت .. حاجة للأسف اللى قدامك مبيعرفش اد ايه هو خسر بانك فقدت اهتمامك حتى فى انك تختلف معاه .. غير لما فعلا بيجرب الاتفاق المهاود والاعتذارات المبتذلة و الاختلاف على ابسط الحاجات اللى كان دايما بيبقى موجود بقى مكانه هدوء عجيب 
حاجة كده صغيرة على شاكلة الحاجات اللى بنفقدها كل يوم من غير ما نحس ومن غير ما الناس اللى حوالينا يحافظوا علينا وبياخدوها مننا وهما مش واخدين بالهم ..

يحدث !

يحدث ان يتقابل غريبين .. يقتربا .. تتلاشى حدود الايام والاعوام بينهم .. ويفترقا
وتجمعهم الاماكن ذاتها، تشهدهم الارائك ذاتها ويشهدهم أناس بعينهم .. ولا يتقابلا
فقط تظل ومضات بضع صور تخبرنا اننا عبرنا الشارع ذاته فى نفس التوقيت .. فقط من نقطتين مختلفتين

فلا ابصرت اعينهم بعضهم ولا تلاشت حدود الشارع العام بينهم كما الاعوام من قبل.. ولا تقابلا مرة اخرى إلا فى بضع 

صور .. 

خاطرة تسجيلية

لأنى بعتبرنى من البنات اللى مش مدلعة ولا فى تربيتها ولا فى البلد
فمن مكانى هنا انا عايزة اعتذر لكل بنت سمعت كلام من قبيل "ايه مالك جامدة كده! مش بنت ابدا دى"

او جمل من قبيل "انا عارف ان معايا راجل" او من قبيل " خليكى كده عامله فيها سبعة فى بعض والله ما انتى نافعة"

والاسوء من قبيل "البنت لو عايزة تبقى اجمل حاجة هتعرف تبقى اجمل الجميلات"

حقك علينا يا ست البنات بقى .. انا بعتذرلك عن القرف اللى بتشوفية فى الشارع والدكر اللى اضطريتى تطلعية عشان تعرفى تصحى كل يوم الصبح وتنزلى فى المجتمع القذر ده

والوش الجامد اللى لزء على وشك من كتر ما اتعاملتى مع اشكال كنتى مرعوبة منها وقولتى بس تعملى جامدة لحسن يجوا جنبك

والوش المكشر اللى بقى عادة من كتر الرجالة الحلوة اللى تيجى تقفلك بالعربية وتكلكسلك  اكنك لابسة بدلة رقص وواقفة تشربى سجاير وتطوحى على الناصية .. مش طلعان عينك من الصبح ومبهدلة

انا بعتذرلك عشان الرجالة فى بلدنا نوعين .. يا نوع بيحرص انك تعيشى المعاناة دى كل ساعة فى اليوم
او نوع مبينسكيش ابداً انك بتدفعى ثمن قذارة النوع الاول

وجب الكلام .. والخاطرة دى للتسجيل

وبعتذر لو فى كلام مش لطيف وبعتذر لفئة قليلة من الرجال اللى اعرفهم شخصيا مش كده