لسة فاكرة

انا لسة فاكرة الساندوتشات اللى امى كانت بتعملهالى فى المدرسة

وشراب المدرسة اللى كان يفضل مبلول لحد الصبح

واصحاب الديسك فى حصة التطبيق و الاملاء المبهدلة

واول مرة خدنا فيها احياء ورسمنا فيها كائنات  

ومدرس التاريخ لما كرهنا فى اللى فات

ومتابعة الفصل لما كانت تضربنا لما ننسى الكشاكيل

وحصة الالعاب لما كانت تقلب رقص وتهيص

ودروس ثانوية اللى كنا بنعد بعدها فى الشارع

ونتيجة التنسيق والتنطيط على الكلية

ومحاضرات الفيزياء فى اعدادى هندسة لما فضلنا مش فاهمين

ومدنى لما دخلتها بصدفة المجاميع

وبلكونتى اللى سمعت صوت عياطى لما خدت مشروع تخرجى

والتحرير وحلم السنين اللى كان بيلمع فى كهف الظروف

ومحمد محمود لما كل حاجة راحت فشوش

ومناقشة مشروعى وهزارى مع الدكتور

واول 400 جنية اخدتهم على شغل مفهمتوش

والولد اللى حلفته يسيبنى ومرضيش ولما اديت الامان كان هو بيبيع

وصاحبى اللى رسالتة وصلتنى بانه مش هيكون لنا غير اللى فات فى عمر بيضيع

انا لسة فاكرة .. ومش كل اللى بفتكروه بضحك لما يعدى فى دماغى
كان نفسى اعرف انسى الحاجات اللى بتوجع ذكرياتى

تلتهمنى دوامات السقوط وشهوة الاستسلام تُزين ابدية الألم التى توشك على الانتهاء 

http://www.paintingsilove.com/image/show/60880/the-sad-girl

إن كنت تنوي الرحيل .. فأنا لا نية لى بالبقاء