يسرقنا الحنين احياناً لأيام لم نُقَدرها حق قدرها حينئذ .. فقدرناها ألماً وحسرة الآن 

... ليتنا نعى ان البدايات مهما تعددت فستهبنا خيبة واحدة فى نهاية الامر 

رمضان

وانت بتنوى صيام كل يوم وربنا كرمك بوافر صحة تقدرك على الصيام افتكر ان فى ناس توفاهم الله مش قادرين يصوموا دلوقتى وفى ناس صحتهم متقدرهمش يصوموا وان قدرتك على الصيام دى نعمة من عند ربنا عشان تعرف تعبدة وتقرب لية مش عشان تبقى شايل هم الصيام

وانت بتفطر فى رمضان وسط عيلتك الكبيرة وقت العزايم افتكر ان فى ناس معندهاش عيلة وان العيلة اللى انت بتتعامل معاها أمر مُسَلم بية نعمة مش عند كل الناس

وانت بتتسحر وسط عيلتك الصغيرة وكلهم موجودين وربنا رازقكم من فضلة افتكر ان فى ناس رمضان السنة دى بيعدى عليهم وهما فاقدين جزء من عيلتهم لأى سبب كان

اتنين متجوزين بيتهم مش بيهدى من كتر الخناق بس رمضان وهما مع بعض غير . لما تتخانقوا كتير افتكروا ان فى ناس من احلامها انها تشارك حياتها مع حد تانى يكون ليها ونس وان مراتك وهى بتعمل الاكل فى كل يوم فى رمضان بتفكر فيك وانها عارفة انك تعبان وهتحتاج تاكل اكل بتحبة . وان هو بيتعب نفسة كتير عشان يسعدك ويرضيكى حتى لو كل يوم بتتخانقوا

وانت اوقات بتزعق لأولادك عشان عامليين دوشة فى البيت افتكر ان فى ناس كل حلمها طفل يملى عليها البيت حتى لو هيعد يجيب الوانة ويرسملهم على ورق الشغل او هيكسر الفازة اللى فيها الورد لانة لسة صوغنن ومش طايل الترابيزة اللى عليها الفازة وعايز يعرف فيها اية

لما تفطر فى مكان برة البيت مع اصحابك احمد ربنا اوى انة عندك اصحاب بتآمنهم على بيتك وعلى اهلك وعارف انهم هيشلوك لو انت مش موجود وان فى كتير معندهمش صحبة خير فى حياتهم

فى رمضان وانت رايح شغلك ومتكدر عشان بتتعب فية وانت صايم زيادة او حتى بتتعامل جامد شوية هناك افتكر ان فى ناس بتدور على شغل من ساعة ما اتخرجت ولسة نصيبها ماجاش

الحمدلله على كتير عندنا بنفتكرة ومبنفتكروش من كترة والحمدلله على اللى مش عندنا لأنة مش رزقنا ومش نصيبنا
رمضان كريم .. وخيرة كتير =)

فضفضة

احساس انك عجوز دة ملوش دعوة انت عشت كام سنة بس لية علاقة قوية بأد اية من السنين عاشتك واستهلكتك حتى لو كان عمرك لسة فى العشرين
كتير بكلم نفسى واسألها مش كفاية كدة فى العمر ..
طول ما احنا عايشين لازم نعافر ونحاول ونتعب ومفيش اختيار انك توقع وتستسلم لازم دايما هتحاول تقوم تقف تانى
ولما بتعب اوى بقول مش كفاية ايام فى العمر كدة .. كل حاجة فى الحياة تقيلة
علاقاتك مع اقرب الناس من اهلك حواليك تقيلة , شغلك ومسؤلياتة تقيلة , واجبات مجتمعك وبلدك ودينك عليك تقيلة , عبادتك لربنا تقيلة , غلطاتك وذنوبك تقيلة , حتى فرحك تقيل
مع الوقت بتحس ان كتافك معادتش قادرة تشيل كل دة بتفاصيلة الصغيرة , وانك مع ربنا مقصر كتير ,ومين من اهلك لازم تساعدة اكتر
وشغلك واتقانة وعلاقاتك مع الناس اللى فهمها صعب .. كتير ومش قادر اكمل
واول ما بوصل للنتيجة دى بفتكر انة وجودنا فى الحياة لية سبب واننا مادام لسة فينا الروح والنفس طالع وداخل يبقى رسالتنا فى الحياة لسة مخلصتش .. طيب اية الرسالة ؟ انا لية موجود هنا !
عشان اشتغل طول العمر فى حاجات انا عارفة كويس انها مش هتفيد الناس كلها , ولا عشان يبقى عندنا بيت واولاد ونربيهم فى مجتمع من ستر ربنا علينا اننا اصلا اتربينا فية ونفدنا !
بتشيل هم كل الناس اللى حواليك ودة بيتعب
يمكن كتابة الكلام دة وانى اقولة بصوت عالى تهون عليا شوية الاحساس دة ويمكن اكون بقول اى كلام ويمكن بس لانى عايزة استسلم فبجرب الاحساس ممكن يكون عامل ازاى فى العشر دقايق اللى بكتب فيهم
والنتيجة بقى .. ان لازم نفكر فى خطة المستقبل وقائمة اعمال بكرة فى الشغل والمسؤليات اللى عليك وتنام كويس عشان تعرف تكمل بكرة طول اليوم لأن كل الكلام المكتوب فوق دة ميهمش حد ولا المفروض انك تستسلم لية عشان لسة مكتوبلك فى العمر ايام لازم تحاول فيها تعمل احسن من كل يوم فات .. "ياللى انت عايش حياة بصلها تلقاها سبحة هنا وتنفرط فى العمر منشوفهاش ولا شئ يعطر حياتنا يمد فى مداها غير سيرة عاشت هنا اكتر صاحبها ما عاش " كلمات من تتر مسلسل حديث الصباح والمساء